人生第一次“勞工處”追欠薪 (2025)
前言：
2021年５年前，香港工作環境都以經慢慢放緩，個人都要出返來打工，係當年有意冇意的一個晚上，就去咗試工，其實當時都係一樣做返以往差唔多工作，送吓貨呀搬吓磚呀咁，都係擔擔抬抬工作，所以冇咩大要求，最大問題係我一向都行得唔係幾好，所以係再前一份工就係以呢個理由就唔用我，其實我一啲都唔介意呢個問題，東家唔打去打西家。
不過我就真係冇諗到係呢份工一做就做咗3年2個月，我當初都諗住我頂唔頂得順做唔做得來人，風雨不改，就連病痛都返，咁就過咗3年多2個月，人生就係咁，做咩事起初都風平浪靜，當總有人係公司搞啲自身利益的時候，冇風冇雨就唔會有波浪，但當有起風浪就好難平靜落來。
打工就係咁，你出糧比我我就要做，我做嘢好多時從來都唔會點同人計較，什至一直我比人做得更多都冇半點聲言，默默耕耘係磨練一種經歷，有好多人都話我傻，但係做任何嘢下下都要計算先去做，我自己做唔到，能幫就幫，我相信總有回報。
決定開始追討：
係2024年11月離職後，本來一直都相信僱主會出返啲糧，起初都話點樣畀同幾時畀，其實我人都會心軟，咁好啦，你話OK又畀到我就OK，點知，兩三個月後態度開始改變，用不同藉口推搪，應承咗又做唔到，往我一直都信你，其實知道公司都有同事被公司拖糧，但佢地一直都冇諗過去勞工處，有啲就好似我咁相信會慢慢還錢，因為大家以經各自離職，所以唔知道大家情況，有時都係信息保持聯絡交流，傾下有冇出糧咁，先知道原來我地一直畀僱主忽悠，由此刻起，我雖然唔知可唔可以追返餘下糧，但我就算當冇人工追唔到都好，我決定人生第一次去勞工處追討欠薪。
2025/４/8 去勞工處：
因為一直都要返工，定好休息日早上做好哂自己嘢，等一個同事就直接上去。
到勞資審裁處取籌排隊
等到左籌號就到櫃檯登記，填表，簽文件等
我地以經搵唔到僱主，所以基本冇得再傾，就算見到傾咩基本都係完全空投支票，所以最後要求勞資審裁處法庭幫忙。
當完所有手續後，就同另外欠薪同事講我地去咗開檔案，其後一齊加入。
2025/４/23 預約勞資審裁處：
第一次去勞資審裁處先欠登記所有人，登記完再上一層主任會分開見每個一人，跟住要將所有表格填好同交文件，點知我地文件同表格填寫唔齊全，主任再比時間我地重新準備，順延至下次。
2025/５/8 重新交文件：
自預約當日因為文件不足同資料未齊所以只好順延至今重新交文件，主任接受同整理後，再落返樓下交費用，自此得到新索書編號，再回上一層等主任交還文件做下一步。
2025/５/15 死線前，提交 / 交換文件＆第一次開庭：
5/8所有事完結後，主任要求全部人所有文件影印一色一份，要在15號此日期前掛號送達被告公司地址，而5月30日就第一次聆訊。第一次審裁處開庭，基本都係先對返自己嘅資料，跟住裁審官就會睇我哋同埋問好簡單嘅問題，因被告者冇出席，財審官逐個逐個問完之後再加上秘書一直紀錄，要求我們提交新嘅指定證據，並且押後第二次審訊，同7月4日死線前，第二次提交及交換文件指示，行到呢度，真係畀裁審官問要我哋陳述書，陳述書係咩嚟我一般都唔清楚，但係我花咗時間上網搜索同打去律師問，最後得出原來係個官當時(要求)嘅嘢，就咁寫/打返出來。
2025/９/18 第二次上庭&裁決：
約兩星期後收到判決信，因為都比較忙，所以自己又拖左少少時間，得知要打電話俾當時管理我地檔案個位主任，但因為電話一直打冇人聽，留言又冇回覆，所以一心10月13日當日食完早餐就直接帶所有文件上去勞工處一趟去問，原來我地個主任都唔係到，但職員都幫忙先打文件正本影印留檔，再叫我地打返個電話留言等回覆，xzy.... 有人聽就一了百了啦，洗搞到我走來走去，人生就不如日常，做每一件事都總有阻滯，但可能算係一個磨練，同時比自己又學識就多一點點。
時間同好多嘢都係一去不返，好同唔好都唔會返到轉頭，只要留住有記諗就好，其它嘢訓一個覺就抹咗去就好，因為我地唔會好似播帶咁可以倒退時間，諗下一秒，下一步，或之後打算就好了。
人生，人生，如何才能美好人生每人都唔一樣，但做人對得住天、地，就覺得心安理得，有得必有失，做任何事只要睇開啲，人就會自然心安理得。
1０月中旬後：
判決信一直都唔知下一步點做，每日工作間唔中就打下電話，有日終於打到電話而且成工約到日子，約到但以經又要再等2個幾月時間。
2026/１/8 破欠基金申請程序：
至2026年1月8日約到破欠基金嘅申請程序，整理好文件填寫所有申請資料，都已經花上好幾個鐘嘅時間，搞完所有手續又再一次要將所有文件重新整理每一套寄去破欠基金審批，呢啲時間冇得拖，盡量喺最短時間完成因為批核時間話面三至六個月。
到最後我再申索個人責任追索，就係另外約勞工處勞資關係追究，呢到就要上東區法院大樓重組案情咁上下，因為我手頭上都係得呈交勞資審裁處嘅所有文件，真係已經搵唔到另外嘅證據，所以我嘅嘢都有啲散散續續，見到主任嗰時已經幫我想辦法咁去堆砌從整資料，重整整理再重整，分開咗兩次約見時間，再下一次時間就要睇進度如何。
2026 完成所有程序：
勞工處追欠薪所有程序以上都已經完成，之後破欠基金都已經一再電話確認，直到三月尾開始有同事收到支票，而我咁啱又放咗大假回咗老鄉，返到嚟我都收到信件，就係咁追索足足滿一年時間，我能做都做咗，能幫都幫咗，可以話係半圓滿，最可惜係搵唔到個仆街僱主，香港有幾大，除非你走佬離開香港，如果唔係我見到一定再一直追究到底。
後記：
打工就打工，老細反面仲比放屁快，口頭事唔可以當真，點努力去做都只係打工，有錢到位就可以，唔可以放任何感情同情，經過呢次我自己都做咗反省，經一事、長一智。
2025/04/08 ~ 2026/04/08 咁啱巧合足足滿一年，但呢一年對我來講係好慢長日子，不過能完成到都算一個目標，打工二話不說，有汗出冇糧出，都即刻唔洗再諗，出完糧就走人。
TAG.: 第一次追欠薪, 2025, 勞工處, 勞資審裁處, 破欠基金
留言
發佈留言